Für a öffentlechi Chrankekassa

D’Gsundhiitschoschte sina ide lösche 10 Jahr um 2,5 % gstige. Im 2011 si das 8000 Franke pro Person gsi. D’Initiativa „Für a öffentlechi Chrankekassa“ wetti di Chöschte im Gsunnhiitswääse sänke. Das Ziiü söü durch d’Iirichtig vonera öffentlechi Iihiitskassa uf Bundesäbeni erreicht cho, wona de obligatorischa Tüi vo de Chrankekasse abdeckt. Si söü di hütige, private Chrankekasse ersetze u ali Iiwohner/-ine vo de Schwiz grundversichere/aune Iiwohner vo de Schwiz a Grundversicherig biete.

Usgangslag

As git hüt 61privati Chrankekasse, wo mitenann im Wettbewarb um d’Chrankepflegeversicherig vo de Chune stane. Dä Konkurränzkampf fünt sowou bi de Grund- wi o bi de Zuesatzversicherig statt. Jedi Person zaut a fixa Biitrag, di sogenannti Chopfprämie, wona vom Iikome unabhängig isch. Dia ischa für Chinn, Jugendlichi u jungi Erwachseni ermässigt/tüüffer. Je nach Chrankeversicherer u Kanton sina di Prämie underschidlech hoi. D’Chrankekasse chiina vo de Versicherete frii gwächslet cho. D’Kündigung passiert ging uf Ändi Jahr. D’Leischtige, wona di Versicherte i Aaspruch näme (z.B. a ärztlechi Undersuechig), chäme vo däne zersch säüber zaut u nai vo de Chrankekasse zrugerstattet. Ii Usnahm büide d’Spitäler, wona meischtens a diräkti Abrächnig mit de Versicherige vornäme.
D’Leischtige vo de Chrankekasse laa sich i d’Beriiche Grund- u Zuesatzversicherige undertiile.

Was würd gänderet?

D’Grundversicherig würdi mit Aanahm vo de Initiativa nüü vonera iihiitlechi Iirichtig düre Bund gführt. Das hiist, dass d’Grundversicherig nit wi bis ize privat, sondern nüü staatlich organisiert cheemi.
Di nationali Iirichtig vom Bund würdi sich i ihras Organisationform a de SUVA orientiere. Dia ischa nämlich di grööschti Unfauversicherig vo de Schwiz u finanziert sich us säübständigi Undernähmig ohni öffentlichi Gäüder. Gliich wi bi de SUVA süü bi de nüi Iihiitskassa vom Bund näbe Mitarbiiter vo de Kantons- u Bundesverwautig o(no) Verträter vode Versicherete u vo de Leischtigserbringer (wi epa Tökter) bi de Usgstautig vo de Iihiitskassa mitwürke. As wäre ali Partie probiere, ihnes iigete Interässe bi de Organisation vo däri Ihiitskassa optimau iizbringe.
Di staatlichi Chrankekassa liita dezue d’Prämie fescht, ziet si ii u vergüetet d’Leischtige a d’Chune. Für jeda Kanton chunt a iihiitlechi Prämie feschtgliit, wo sich dür d’Chöschte vo de Chrankeversicherig pro Kanton berächnet. So geebines witerhiin Underschiide zwüsche de Kanton, was d’Prämie aagiit. Dass, wi iz grad aber d’Prämie o innerhaub vomena Kanton chii variere, das geebines nümme.

Uswürkige

Mit de Iihiitskassa chunta d’Grundversicherig statt durch 61 privaati Chrankekasse durch ii staatlichi Iirichtig usgüebt. Das Gschäft mit de Zuesatzversicherige blibt wi bim itzige Syschtem i privaate Hänn, genau gliich wi d’Arztpraxe, d’Therapiiagebot u a Tüi vo de Spitäler.

Argumänt vo de Befürworter

  • Will d’Wärbechöschte u anderi Usgaabe für z’Gwine vo de Chune u o Adminischtrationschöschte binera staatlechi Chrankekassa sinke, chentemu Chöschte spaare.
  • Dür d’Trenig vo Grund- u Zuesatzversicherig weeri a effiziänteri Behandlig vo chroonisch Chranke (auso tüüre Patiänte) möglech u z’Interässe a de Prävention würdi sich stigere. Das äbe will Diskriminierige i de Zuesatzversicherige ki Iifluss meh uf d’Grundversicherig hetti.
  • Di pro Kanton iihiitlich u choschtebasierte Prämie schaffti ungrächtfertigti Choschteunderschiid zwüsche de Versicherete ab.
  • Iihiitskasse würdi zunera klaareri Trenig zwüsche Grund- u Zuesatzversicherig führe. De Wettbewärb söüs im Beriich vo de Zuesatzversicherige witer gää.
  • As weeri iifacheri u transparänteri Tarifverhandlige zwüsche de Chrankekasse u de Leischtigserbringer, wi zum Bispüi Tökter, möglech.

Argumänt vo de Gägner

  • D’Initiativa würdi a Monopoustölig vo de Iihiitskassa bewürke. So würdemu gäge z’Prinzip vom Wettbewärb verstosse u dür das geebines nai a kinner Aareiz meh für d’Choschte z’sänke oder füre Service z’verbessere.
  • Prämieverbiligunge sigi nit z’erwarte, will d’Chöschte vo de Leischtige u nit vo de Organisationsform vo de Chrankekassa abheiche.
  • Will inera Iihiitskassa vüi verschideni Partiie (vom Bund, de Leischtigserbringer, de Versicherete, etc.) verträte si, geebines sicher zitintensiivi Konflikt innerhaub vo de Organisation. Das würdi de Fokus vo de Choschteiispaarige ablänke.
  • Di aktueli Situation sigi zfrüdestölend: Di luufende Aastrengige zu de Choschtesänkige u Qualitätsverbesserige im Rahme vo de Uberarbiitig vom Chrankeversicherigsgsetz sigi gnüegend.
  • Vüi Chrankekasse würdi nit usschliesslich vom Gschäft mit de Zuesatzversicherige chene lääbe. Si müessti därum zuetue.

Easyvote Video

Links

In Zusammenarbeit mit Vimentis und dem Jugendrat Freiburg

Jugendrat

Quelle: Abstümmigsbüechli , www.vimentis.ch, www.easyvote.ch

Falls etwas nicht neutral sein sollte oder euch sonst etwas stört, meldet euch bitte bei uns.