Initiative „Gäge Masseiwanderig“

Um was giites?

Momentan ligtes i de Hann vo de Würtschaft, wivüu Persone pro Jahr i üsersch Lann iwandere. Dadebii stiites jederi Person wo i de EU oder i de EFTA (Norwege, Island, Liechstestii) läbt frii, sich i de Schwiz niderzlaa, wesi hie a Beschäftigung cha vorwiise.
Di Vouksinitiativa het zum Ziu, dass de Staat d Zuewanderig vo usländische Persone usum europäische Rum säuber reguliert. Das söu mit jährliche Höchschtzahle u Kontingänt passiere. So süü ufum Arbiitsmarkt Persone wo i de Schwiz lääbe a Vorrang becho gägenüber Arbiitssuechende us de EU / EFTA. D Personefrizügigkiit mit de EU u de EFTA müessti naverhandlet u möglicherwiis sogar ganz nüü verhandlet cho.

Argumänt defür:

  • D Zuewanderig vo jährlich ungfähr 80’000 Persone id Schwiz (verglichbar mit de Iwohnerzau vo de Stadt Luzärn) isch z vüu
  • Verluscht vo Sidligsflächi (jährlich d Flächi vo 4448 Fuessbaufäuder)
  • Problem für d Infrastruktur vo de Schwiz (überfüuti Züg, verstopfti Strasse, etc.)
  • Di starchi Zuewanderig verstercht Lohndruck u stigendi Miete

Argumänt degäge:

  • D Zuewanderig triit zum Woustann vo de Schwiz bii
  • A Stüürig vo de Zuewanderig mit Kontingänt hetti a grossa administrativa Ufwann zur Foug u d Würtschaft hetti Müeh bi de Suechi nach ggeignete Arbiitschräft
  • D Initiativa chennti ds Endi vo de Personefriizügigkiit u vo de Bilaterale 1 bedüte (faus d EU d Personefriizügigkiit nid wott naverhandle)
  • Ussländleschi Arbiitschräft chäme i de Schwiz dringend brucht (ufum Buu, im Gsundhiitswääse, Ingeniööre, etc.)

Spezielli Uswürkige für üs Junge?

D Jugend vo hüt würd am lengschte mit würtschaftliche u gsöuschaftliche Entwicklige z lääbe ha. Iinersits chennti si möglicherwiis würtschaftlechi Problem duch d Gfährdig vo de bilaterale Abkome mit de EU träffe, anderersits vülech a gsöuschaftlichi Veränderig duch meh Zuewanderig i d Schwiz.

Easyvote Video

Links

Quelle: Abstümmigsbüechli , www.vimentis.ch, www.easyvote.ch, www.parlament.ch, www.admin.ch

Faus epis nid setti neutral sii oder schüsch epis nid guet isch, de mäudet öich bitte bi üs