Bundesbeschluss “Füre öffentlicha Verchehr” – FABI

Um was giites?

Dä Bundesbeschluss gseht vor, ds Zugagebot für Persone u Güeter uszbue. D Uberlegig zu däm Usbuu isch, dass ds Schwizer Zugagebot duch di starchi Beanspruchig a sinner Gränze stosst. Für de grossi Uslaschtig Abhüuf z schaffe, hii Bundesrat u Parlamänt beschlosse, meh Gäud i Usbuu u i Underhaut vom Schinenetz z investiere. Di finanziele Mittu füre Usbuu vo de Infrastruktur vom Öffentliche Verchehr süü sich in Zuekunft wi fougt zämesetze:

  • Ca. 4 Mia./Jahr wi bishär: Abgabe us de Leischtigsabhängigi Schwerverchehrsabgaab (LSVA; das isch a Stüür, wo uf jeda gfahrena Kilometer mitema Camion erhobe chunnt) u augemiini Bundesmittu (Gäud usum Bundesbudget)
  • Ca. 1 Mia./Jahr nüü: 1 MWST-Promille, Kantonsbiträäg, hööjeri Billetpriise, maximala Fahrchoschteabzug (das hiisst, dasmu numeno a gwüssa Maximaubetrag vo de Stüüre cha abzieh, wemu mitum Outo giit ga wärche)

Argumänt defür:

  • A gueti Zuginfrastruktur isch wichtig für d Schwiz u ohni di Verfassigsänderig stiit lengfrischtig nid gnue Gäud zur verfüegig
  • Erhööiti Sicherhiit im Zugverchehr duch Investitione i Betriib u Underhaut vom Schinenetz
  • Entlaschtig vom Strasseverchehr duch besseri öffentlechi Verchehrsmittu
  • Erhööiti Leischtigsfähigkiit vom Zug (Pünktlichkiit, Vermiidig vo Störige, etc.)

Argumänt degäge:

  • Outofahrer zahle de Öffentlicha Verchehr mit, obwou si ne nid nütze
  • De Usbuu vom Öffentliche Verchehr isch z tüür
  • D Beschränkig vo de Pendlerabzüüg trifft Arbiitnähmer, wo nid d Möglichkiit hii, mitum Zug ga z wärche.

Spezielli Uswürkige für üs Junge?

Wär jung isch, isch mobil. Wär täglich mitum Zug zu de Püez oder id Schuu pändlet, würdi einersits vo de verbessereti Infrastruktur profitiere, anderersits de Usbuu mit hööjere Billetpriise müesse mitfinanziere. Di wo uf ds Outo agwise sinn für ga z wärche, würdi äbefaus tüüfer id Täscha müesse griiffe, da de Pändlerabzug beschränkt chunnt. Allerdings chenntines für si duche Usbuu vom ÖV meh Platz uf de Strass gä.

Easyvote Video

Links

Quelle: Abstümmigsbüechli , www.vimentis.ch, www.easyvote.ch, www.parlament.ch, www.admin.ch

Faus epis nid setti neutral sii oder schüsch epis nid guet isch, de mäudet öich bitte bi üs