Initiative „Abtriibig isch Privatsach“

Um was giites?

Zum itzige Zitpunkt isch de Schwangerschaftsabbruch bis zunera gwüssi Duur vo de Schwangerschaft straffrii möglich (Frischtelösig). Dä Schwangerschaftsabbruch chunnt vo de obligatoreschi Grundversicherig vo de Chrankekassa zaut.
D Initiativa, wommer am 9. Februar 2014 druber abstüme, verlangt, dass a Abbruch vo de Schwangerschaft nid wi bis anhin duch d Gundversicherig vo de Chrankekassa finanziert chunnt, sondern dass jedi Frou de Schwangerschaftsabbruch säuber söü zahle. Lutum Initiativatext si Usnahme für säuteni Fäu vorgseh. Di Usnahme beschränke sich aber uf d Mueter vom Chinn u si i de Initiativa nid nöcher beschrübe.
Nach wie vor bestiiti d Möglichkiit, sich mitera Privatversicherig gäge di finanziele Fouge vonera Abtriibig z versichere.

Argumänt defür:

  • D Chrankekasse süü Lääbe rette u heile, u nid ds Töte finanziere
  • Ali Versicherete zahle mit ihnes Prämie di moralisch/ethisch umstritteni Abtriibig
  • D Initiativa verbietet d Abtriibig nid
  • Choschteisparig bi de Chrankekasse

Argumänt degäge:

  • De Konsens uber d Abtriibig chunnt i Frag gstöüt
  • D Choschteisparig bi de Chrankekasse weri minim
  • Negativi individueli u gsöuschaftlechi Fouge wena Mueter ihras Chinn nid wott, is aber us finanziele Gründ glich uf d Wäut bringt
  • Unklarhiite bi aufälige Usnahme im Bezug uf d Abtriibig

Spezielli Uswürkige für üs Junge?

Grad bi junge Froue (u denes Partnere), wo no i de Usbüudig sinn, stöut sich binnera ungwouti Schwangerschaft d Frag nachumena Schwangerschaftsabbruch – u wäge ihnes hüffig knappi Finanzlaag grad o di finanziele Fouge.

Easyvote Video

Links

Quelle: Abstümmigsbüechli , www.vimentis.ch, www.easyvote.ch, www.parlament.ch, www.admin.ch

Faus epis nid setti neutral sii oder schüsch epis nid guet isch, de mäudet öich bitte bi üs