Autobahnvignette

Um was giites?

De Bundesrat u z Parlamänt wi z Netz vo de schwiizer Nationalstrasse wiiter ausbue. Us däm Grund hisi entschide, rund 400 Kilometer a Kantonaustrasse i z Nationalstrassenetz ufznä. Usserdäm tuet de Bund uf dene Strasse wichtigi Umfahrigsprojekt umsetze. Zum d Chöschte vo däm z decke, wott ds Parlament de Priis vo de Outobahnvignetta vo 40 uf 100 Franke im Jahr wui ta. Usserdäm söus a 2-Monets-Vignetta gä für Touriste u Lüt wo nume inera bstümmti Saison fahre. D Priiserhöiig u de Usbuu vom Strassenetz si anenand gchnüpft. De Bundesrat u z Parlament tüe empfähle, d Erhöiig u demit de Usbu aznä.

Argumänt defür:

  • De Usbuu vom Netz het zum Ziel, alli Regione u wirtschaftliche Zentre z vernetze u d Ereichbarkiit vo Orte wird verbesseret
  • Dringendi Umfahrige chi verwürklichet cho u Outobahnstreckene chäme usbuut
  • Di löschi Apassig vo de Priise ligt fasch 20 Jahr zrugg u de Ufwand vom Betriib vo dene Strasse isch starch gstige
  • De Priis isch im Verglich zu Länder wi Frankrich, Italie oder Spanie ging no tüüf, det zautmu töuwiis fürna Feriereis so vüu wi i de Schwiiz fürnas ganzes Jahr
  • Usländer wo üser Strasse nutze müsse ging no zur Finanzierig biitrage, im lösche Jahr het dä töu meh aus a drittu vo de gsamterträg vo de Vignette usgmacht
  • D’Strasse chi nume erwiiteret cho we d Vorlag für d Priiserhöiig agno chunnt, di 2 Sache si rächtlich anenandkopplet
  • As guet usbuuts Strassenetz stärcht d Schwiizi

Argumänt degäge:

  • Vo 40 Franke uf 100 Franke entspricht ara Priiserhöiig vo 150%, das isch z vüu
  • Usem Strassevercher nümmt de Bund iz scho jährlich um di 10 Milliarde Franke a Gäuder i, nume 30 Prozänt devo fliesse ummi zrugg i Strassevercheer, de Räscht giit a Bund oder a d Bahn wo eh scho defizit macht.
  • De Zug wird bevorzugt. As git a Fonds für d Bahn, u nid für d Strasse, obwou de Bund das versproche het. Mit de 100 fränkigi Vignetta tuetmu auso ifach fange abgä, buchunnt aber nüt zrugg.
  • Das Gäud vo de Vignetteerhöiig isch scho verplanet, as wird nai gar nid det igsetzt wones würklich Verchersproblem git
  • Usländer chäme bevorzugt, si müsse nume di billigeri Vignetta für 40.- chuufe

Spezielli Uswürkige für üs Junge?

Nid spezieu.

Easyvote Video

Links

Quelle: Abstümmigsbüechli , www.vimentis.ch, www.easyvote.ch, www.parlament.ch, www.admin.ch

Faus epis nid setti neutral sii oder schüsch epis nid guet isch, de mäudet öich bitte bi üs