Dringlechi Änderig vom Asylgsetz

Um was giites?

D Bearbiitig vomena Asylgsuech duuret meischtens sehr lang. Wüu o d Anzau vo de Gsuech stitgt, gites ging meh Asylbewärbere i de Schwiz. U für di muesmu o ging ommi a Platz sueche. Das wott ds Parlamänt mit as paarne Apassige im Asylgsetz ändere.

Di Änderige si:

  • I Schwizer Botschafte im Usslann chii kinner Asylgsuech meh gstöut cho.
  • D Beschwerdefrischt gägena negativa Entscheid chunnt verchürzt.
  • Militärdienschtverweigerig aliinig isch ki Asylgrund meh. Nume wäm duch d Militärdienschtverweigerig a sehr schlümi Straf droht, bechunnt i de Schwiz Asyl.
  • Gebäude, wo im Bund kööre, töffe o ohni Zuestümig vo Kanton u Gmiin aus Asylunderkunft brucht cho. (max. 3 Jahr).
  • Renitänti Asylbewärbere (settegi wo di öffentlichi Ordnig u Sicherhiit störe) chii früsch i speziele Zentre underbracht cho.

Argumänt defür:

  • Mit de Änderige sinkt d Zau vo de Asylgsuech, was Platz i de uberfüute Asylunderkünft schafft.
  • We de Bund iifacher iigeti Zentre cha eröffne, de chäme Kantön u Gmiine entlaschtet.
  • D Verschnällerig vom Asylverfahre hüuft beidne – de Schwiz u de Asylsuechende.
  • Asylbewärbere, wo d Regle starch verletze, chii i extra defüür iigrichteti Zentre verlegt cho. So chamu si „usum Verchehr zieh“.

Argumänt degäge:

  • D Abschaffig vo de Botschaftsgsuech cha Mänscheläbe gfährde u hüuft nume de Schleppere.
  • D Ablehnig vo Chriegsdienschtverweigerer isch unmänschlich u verletzt di humanitäri Tradition vo de Schwiz.
  • As bestiit d Gfahr, dass Asylbewärbere wäge „Nüt“ i de strenge Renitäntezentre underbracht chäme.
  • D Änderige beschleunige d Asylverfahre chum u bringe so o a ki Erliechterig.

Spezieli Uswürkige für üs Junge?

Nei.

Links

Quele: Abstümmigsbüechli (09.05.2013), www.vimentis.ch, www.easyvote.ch, www.parlament.ch, www.admin.ch

Faus epis nid setti neutral sii oder schüsch epis nid guet isch, de mäudet öich bitte bi üs.