Nachtbuskonzept Sense

Endlich chiimer öch ds „Abe- u Nachtbuskonzept Sense“ präsentiere!

Nachtbus

Quelle: http://files.newsnetz.ch/story/2/8/7/28742842/3/topelement.jpg

As wichtigs Aalige vom Veriin Jugend u Politik Sense isch, d Forderige vo de Seisler Jugend a d Politik häräztraage. U da stiit ds dürftiga Nachtbusagebot uf Friburg u vor allum vo Friburg zrugg i Seisebezirk a vorderschter Stöu. Wüu we mier am Wuchenänd uf Friburg i Usgang wii ga, de simmer praktisch uf epper, wo mitumena Privatouto fahrt (u nid triicht) oder ufenas tüürs Taxi agwise; wemmer nid scho vor Mitternacht ommi hiim wii.

Wület amena knappe Jahr hiimer därum intensiv amena bessere Abe- u Nachtbuskonzept füre Seisebezirk gschaffet. Das si di wichtigschte Nüerige, wo üsersch Konzept vorgseht:

  • Zuesätzlechi Abebusse uf aune Busstrecke mit Ankunft z Friburg an zwüsche 20:00 u 20:30 Uhr (Fritig u Samschtig)
  • Zuesätzlechi Nachtbusse für ALI Gmiine vom Seisebezirk mit Abfahrt z Friburg ab 02.00 Uhr (Fritig- u Samschtignacht)

Finanzierig duch Nutzer u Gmiine

Üs isch klar, dass grad di zuesätzliche Nachtagebot nid gratis sinn. Wier schlee därum a Wächsu zum MOONLINER-System vor. Bi däm System ubernähme d Gmiine de Feuhbetrag bis zuner maximali Hööji, füre Fau dass d Inahme usum Billetverchuuf nid de gsamta Ufwann abdecke. U i de MOONLINER-Busse zöle kinner Abonnänt. So chäme d Nachtbusse vo däne finanziert, wo si bruche.

Nachtbusagebot aus Tüu vo de Jugendarbiit

Wier füne, dass jungi Erwachseni i de hütegi Jugendarbiit hüffig vergässe chäme. Wier bruuche kinner Jugendrümleni meh, sondern attraktivi Verbindige uf Friburg, womer i Usgang gange. Im Vergliich zu de bärnische Nachbarsregione isch de Seisebezirk hie klar schlächter gstöut.

Us üseri Sicht isches sinnvoller, de junge Erwachsene a Nachtbus azbiete, anstatt isi mit Privatoutos i Usgang la z fahre. Erschtens isches nid ging ifach as Outo z organisiere, gschwige denn a Parkplatz i de Stadt z füne u zweitens bestiit bi Junglänkere, wo nachum Usgang hiim fahre, a massiv erhööiti Umfaugfahr, wüu si hüffig ubermüedet si oder sogar under Aukohouifluss stane. D Nachtbusse biete meh Sicherhiit u leischte usserdäm a Biitrag zunera nachhautegi Mobilität.

Wie witer?

Für das Könzäpt chene i d Tat umzsetze, hiimer im Presidänt vo de Region Sense, im Oberamtmaa Nicolas Bürgisser, de Vorschlag gmacht, a Arbiitsgruppa zu de Prüefig u Erarbiitig vomena Nachtbusagebot izsetze. Witersch het d JPSense de Vorsteher vo de Umwäut-, Rumplaanigs- u Buudiräktion, de Staatsrat Maurice Ropraz, bätte, de Öffentlicha Verchehr am Aabe (Fritig u Samschtig) uszbue.

Ds vouständiga Konzept chiiter hie us PDF ailaade.

Wier freuenis uf öjer Rückmäudige, Verbesserigsvorschleg u Fraage. Hie giites zum Kontaktformular.