Fonds für die Nationalstrassen und den Agglomerationsverkehr

Ziel vo de Vorlag:

Mitem Bundesbeschluss über d´Schaffig vom NAF sou d´Finazierig vom Nationaustrassenetz i de Schwiz langfristig gsicheret cho.

Was würd gänderet:

De Betib, de Unterhaut u de Usbuu vom Nationaustrassenetz chunnt nü usemena i de Verfassig verankereta unbefristea Fonds finanziert. De Fonds würd us de Inahme vo de Minerauöustüür, vom Minerauöustüürzueschlag, vo de Outobahnvignietta, vo de Outomobilstüür u ab 2020 vonera Abgab uf e-Fahrzüg zämegsetzt si. D´Zwäckbindig vo de Mittle würd erhöiht, wüu de Atüu a de Minerauöustüur u de Outomobilstüür bis iz i allgemeina Bundeshuushaut gflosse si.

Argument defür:

  • Dür di unbefristeti Luufzit u dür t Verankerig i de Verfassig würd d´Finanzierig vom Nationaustrassenetz langfristig gsicheret, Engpäss chä besitiget u d´Strass würd de Schina glichgsetzt.
  • D´Städt u d´Agglomeratione chäme dür di gsicherete Bundesbiträg für wichtigi Projekt entlastet.
  • Dür d´Erwiterig vom Netz um 400 Kilometer chäme Land- u Bärgregione unterstüzt u de Würtschaft würd schlussendlich a wettbewerbsfähigi Infrastukur zur Verfüegig gsteuut.

Argument degäge:

  • Dür d´Zwäckbindig vo de Mittle, wo vorhär im allgemeina Bundeshuushaut zur Verfüegig gstanne sin, wärde im Verursacherprinzip anderi Ufgabe vo de öffentlichi Hann gopferet.
  • Ds vorgsehna Usbuuprogramm förderet d´Rückverlagerig vom Vercheer vo de Schine uf d´Strass. Das schadet im Klima u d´Landwürtschaft chunnt verbuut.
  • As git ki sachlicha Grund, d´Finanzierig vo Agglomerationsprojekt mit de Finanzierig vom Nationaustrassenetz ds verchnüpfe. Di cha o anderswitig organisiert cho.

Easyvote Video

Links

In Zusammenarbeit mit Vimentis und dem Jugendrat Freiburg

Jugendrat

Quelle: Abstümmigsbüechli , www.vimentis.ch, www.easyvote.ch

Faus epis nid setti neutral sii oder schüsch epis nid guet isch, de mäudet öich bitte bi üs